2025-yilda O‘zbekistonda 43 milliard dollarlik investitsiyalar o‘zlashtirilishi rejalashtirilgan.
20.12.2025
2025-yilda O‘zbekistonda 43 milliard dollar miqdoridagi investitsiyalar o‘zlashtirilishi rejalashtirilganligi prezident raisligida o‘tkazilgan yig‘ilishda ta’kidlandi. Investitsiyalar vaziri asosiy e’tibor importni kamaytirish va mahsulotlarni mahalliylashtirish darajasini oshirishga qaratilishini qayd etdi.
Prezident Shavkat Mirziyoyev 19-dekabr kuni 2024-yilda investitsiyalar sohasida amalga oshirilgan ishlar yakuni va 2025-yilgi vazifalarga bag‘ishlangan yig‘ilish o‘tkazdi.
Bu so‘nggi bir oy ichida investitsiyalar masalasiga bag‘ishlab o‘tkazilgan ikkinchi yig‘ilishdir. Noyabr oyining oxirida ham xorijiy investitsiyalarni jalb qilish holati va 2025-yil rejalari “tanqidiy rejimda” muhokama qilingan edi.
Ta’kidlanishicha, 2017-yildan buyon O‘zbekiston iqtisodiyotiga barcha manbalar hisobidan 188 milliard dollar miqdorida investitsiyalar jalb qilingan, shundan 87 milliard dollari xorijiy sarmoyalardir. Bu esa investitsiyalarning YaIMdagi ulushini 30 foizdan oshirishga imkon berdi.
2024-yilda O‘zbekiston iqtisodiyotiga kiritilgan investitsiyalar hajmi 1,3 barobarga oshib, 36 milliard dollardan oshdi, deyiladi xabarda. Shu hisobidan yil boshidan buyon umumiy qiymati 70 trillion so‘m bo‘lgan 560 ta yirik va o‘rta loyiha ishga tushirildi. Bu esa kelgusi yilda eksport hajmini 1 milliard dollarga oshirish uchun asos yaratdi.
Yig‘ilishda investitsiyalar, sanoat va savdo vaziri Laziz Kudratov 2025-yilga mo‘ljallangan rejalarni taqdim etdi.
Kelasi yilda 43 milliard dollar miqdorida investitsiyalar o‘zlashtirilishi rejalashtirilmoqda. Bu esa 300 dan ortiq yirik loyihalarni amalga oshirish va import bilan raqobat qila oladigan 662 ta yangi turdagi mahsulot ishlab chiqarishni yo‘lga qo‘yishga imkon beradi.
Davlat rahbari xorijiy investorlarga nishonli yondashuvni, ular uchun sharoitlarni kengaytirishni va erishilgan barcha kelishuvlarni sifatli amalga oshirishni ta’kidladi.
Hozirda 1890 ta loyiha ustida ish olib borilmoqda. Ularning tezlashtirilishi uchun mas’ul rahbarlar belgilangan.
Yig‘ilishda prezident tashqi savdo masalalarini ham muhokama qildi.
«Murakkab xalqaro vaziyat sharoitida ushbu sohada muvaffaqiyatga erishish uchun maxsus sa’y-harakatlar talab etiladi. Eksport-logistika zanjirlari murakkablashmoqda, asosiy eksport bozorlarida tayyor mahsulotlarga bo‘lgan talab kamaymoqda. Bunday sharoitda iqtisodiy o‘sish sur’atlarini tezlashtirish uchun ichki resurslarni to‘liq safarbar qilish zarur. 2030-yilgacha yillik eksport hajmini ikki barobar oshirib, 45 milliard dollarga yetkazish maqsad qilinmoqda», — yig‘ilishda ta’kidlandi.
Buning uchun investitsiya loyihalarini o‘z vaqtida ishga tushirish, yuqori qo‘shilgan qiymatga ega mahsulotlar va xizmatlar ishlab chiqarishni ko‘paytirish hamda eksport bozorlarini kengaytirish muhimligini Shavkat Mirziyoyev ta’kidladi.
